رمضان 2020 | رمضان زمان | الحلقة (2) .. قمر الدين وأغاني رمضان
رمضان 2020 | يأتينا هذا العام رمضان في زمن الكورونا ، حيث قد تختلف عاداتنا كليةً عما اعتدنا لكن حتى ما سبقه كان يختلف بالتأكيد عن رمضان زمان عندما كان لرمضان لون وطعم ورائحة. رمضان زمان سلسلة حصرية يكتبها لنا في رمضان هذا العام المهندس المصري عاشق الأدب والتراث “صلاح أبو الليل” وحلقة اليوم عن “قمر الدين”
رمضان 2020 – رمضان زمان
الحلقة الثانية – قمر الدين
يا صايم رمضان .. يا موحد ربك قطتنا البيضاء .. تبوسك من خدك
يا فاطر رمضان .. يا خاسر دينك قطتنا السوده .. تقطع مصارينك
دي كانت أغاني رمضان زمان .. بيرددها الأطفال في الشوارع و الحواري و المناطق الشعبية .. و كانت منسوجة من كلمات الفلكلور المصري الشعبي البسيط .. لما نسمعها نعرف ان رمضان هل هلاله و الصيام بدا … و يخرج الأطفال شايلين الفوانيس و يلموا فلوس من الكبار … ” ادونا العادة … بس بزياده ” .. يا ترى في رمضان 2020 لسة بنسمعها!.
طب مين فاكر المقطع ده .. ” ادونا العادة، الله خليكوا ” ؟ ده من أغنية أولها كان
أهو جه يا ولاد … هيصوا يا ولاد … زقططوا يا ولاد
في كل عام و يانا معاد
وعمره ما بيخلفش ميعاد
أهو جه يا ولاد
جبتلنا معاك الخير كله
م الصبح نقوم ونحضر له
من قمر الدين وبلح على تين
والمغرب للمدفع واقفين
قالوا فين؟
وحوي يا وحوي إياحا
و كمان وحوي إياحا
دي موسيقى العبقري علي إسماعيل، و كلمات زوجته الشاعرة نبيلة قنديل. الحقيقة انها كلمات عبقرية فيها جمل من كل تراثنا و موروثاتنا الجميلة .. حتي وحوي يا وحوي اياحة اللي بترجع للعصر الفاطمي في رمضان زمان ، و العصر الفرعوني من قبله، ولسة عايشة معانا في رمضان 2020.
غني اللحن ده الثلاثي المرح .. سهام توفيق وصفاء لطفي و سناء الباروني … اخت الفنانة سهير الباروني .. اللي اتجوزت من المخرج الكبير حسن الإمام فيما بعد
الثلاثي المرح ده غني برضه لرمضان الاغنية الشهيرة جدا (سبحة رمضان لولي ومرجان بتلاتة وتلاتين حباية).
الثلاثي ده اللي ظهر في الخمسينيات الماضية، هو ده اللي طلع في فيلم صغيرة علي الحب بتاع سعاد حسني و رشدي اباظه .. وكمان دول اللي غنوا من موسيقي علي اسماعيل … حلاوة شمسنا ، كمان دول بتوع العتبه جزاز … و ما نتاش خيالي يا وله … و العديد من الأغاني اللي شكلت وجداننا و رسمت من جديد خطوط تراثنا الذي كاد أن يندثر، بعد أغاني المهرجانات وأغاني رمضان 2020 اللي أغلبها بقى مجرد إعلانات شركات.
من الاغاني طبعا اللي مرتبطه جدا معانا برمضان … اغاني ابن البلد شكوكو … و صاحب السعادة اسماعيل يس …
اللي منهم اغنية شكوكو الشهيرة :
“حبك شمعة وقلبي فانوس وبتلعب بي.. وحوي يا وحوي.. ياما هواك غرمني فلوس ارحم قلبي.. وحوي يا وحوي…. من يوم حبك وأنا مسكين.. كل ما أبعت شوق وحنين.. بترجعهم لي وتقول لي.. غيرهم لي بـ قمر الدين.. وكل يوم على دي الحالة.. يا الله الغفار.. دا قلب ده ولا بقاله.. يا الله الغفار.. مهما هواك يديني دروس ما بحرمشي.. وحوي يا وحوي”.
و أغنية اسماعيل يس الشهيرة الحاج أمين:
الحاج أمين قال للصايمين ..
أنا عندي التين و القمر الدين
والشيخ رضوان دخل الدكان ..
واشترى م الخير أشكال وألوان
وطلع فرحان .. يدعي لرمضان
ومعاه التين والقمر الدين
الشيــــخ رضـــــوان هــدى
وحود على عبــد العـــــــال
خد منــــــــــه قطايـــــــــف
وكنافــــة ودفعلـــــه ريـــال
وطلع من عنده مش عارف
راح يمشــــــــــــــــي إزاي
من كتر الخيـــر متهيـــــأله
ينــده شيــــــــــــــــــــــال
والشيخ رضوان رمز وعنوان
للخير في بلادنا و للملايين
راجع فرحان يدعي لرمضان
ومعاه التيــن والقمر الديـن
استمع لصوت الرائع إسماعيل يس في أجمل أغاني رمضان زمان .. الحاج أمين:
و نخش في موضوع النهارده … قمر الدين اللي بيتكرر في معظم أغاني رمضان و كأنه أحد رموز الشهر الفضيل … طول عمري بيلفت نظري الاسم ده .. اكمني اسمي صلاح الدين .. و هو قمر الدين … و من صغري و الأطفال الأغبياء بيسألوني في الفصل .. هو أبوك اسمه الدين ؟؟ 🙂 .. فكان اسم قمر الدين بيلفت نظري و نفسي اعرف هو انسان و لا جماد و لا حيوان … لما كنا بنلعب أتوبيس كومبليت و كده … اللي هي بالمناسبة طلع اسمها (Stop it is complete)
و من باب التعريف بالسيد قمر الدين فهو مشروب عرفه المصريين من زمان جدا .. من قبل طبعا رمضان اللي بيجي في الربيع .. من أيام الدولة الفاطمية و يمكن أقدم كمان … مصدره الشام وتركيا .. و بيتصنع من المشمش اللي بيكثر هناك …و لمتابعة طريقة التصنيع و العمايل ممكن تتابع أي قناة يوتيوب هتلاقيه بسهولة بالذات في رمضان 2020 الإنترنت مخلاش حاجة 🙂 .. بس لمعرفة أصل التسمية … تعالوا نحكي 🙂
مش معروف أصل تسمية بالظبط … بس في ناس قالت إن أشهر بلاد صناعة المشمش زمان و تحويله لقمر الدين كان اسمها ” أمر الدين ” علي حدود سوريا و تركيا .. و منها جه الاسم … ناس تانيه قالت ان المشروب ده كان بيتم توزيعه علي الناس في الشوارع أول ما يثبت ظهور قمر أو هلال شهر رمضان .. فاتسمي قمر الدين .. و دي الرواية الأشهر .. و الاتراك مكانوش بيفرقوا بين القمر و الهلال أوي يعني … و في كلام ان أول واحد أدخل المشمش إلى مصر كان شامي و اسمه قمر الدين … زي الاستاذ يوسف أفندي اللي أدخلنا اليوستفندي مصر 🙂
صيامكم مقبول باذن الله… و اسيبكم في أمان الله وبكرة نشوف حكاية اليوستفندي إيه.
بالمناسبة تفتكروا أنهي كان أحلى و أكتر ألفة ، رمضان زمان .. ولا رمضان 2020 ؟!
إذا أعجبك المحتوى لا تنس أن تسجل إعجابك و تترك لنا تعليقك لنستمر .. رمضان كريم
المصدر : هلا جورجيا - ويكيبيديا
