رمضان 2020 في زمن الكورونا

حلاوة زمان (4) .. زوس فلد ادب يوك

حلاوة زمان سلسلة حصرية تأخذنا في حنين لذكريات أيام زمان، يكتبها لنا في رمضان هذا العام المهندس المصري عاشق الأدب والتراث “صلاح أبو الليل” وحلقة اليوم عن “لغة الأتراك .. ادب يوك”


حلاوة زمان – 3 – زوس فلد ادب يوك

اتكلمنا امبارح عن ان الاتراك غالبا هم اللي سموا قمر الدين بالاسم ده .. لانه كان بيتوزع لما يثبت هلال او قمر الشهر .. و الحقيقة ان الاتراك كان ليهم اثر كبير و رغبات من زمان في السيطرة علي العالم .. و طبعا مصر كانت – و لا تزال – مطمع العالم فهي درة الشرق بحق … و قد دخل الاتراك مصر كتير بغرض التجارة او الهجرة او الاحتلال و الاستيطان و احنا كمصريين … عشريين اوي الصراحه .. نستقبل اي وافد .. و نتاثر بيه .. و ناثر فيه كمان و نندمج سوا ، حتى لو كان بيشتمك ويقولك انك  ادب يوك .. يعني قليل الأدب

لما الاتراك عاشوا معانا خدنا منهم مثلا .. مقطع ” خانه ” … زي لما نقول … مسافرخانه يعني فندق و ده في اللغه الفارسيه كمان.. اجزاخانه يعني صيدليه لان الاجزه يعني الدواء او العقار … عربخانه .. و ده مكان تخزين العربيات الكارو و مبيت السياس و العربجيه .. تلاقي المكان تحت فيه خيول و حمير و فوق مبيت السواقين .. و المكان كله فوضي و ريحه مش تمام .. حتي بقي مضرب المثل في الفوضي و القذارة .. يقولك دي عربخانه 

حلاوة زمان (4) .. زوس فلد ادب يوك 1

السلخانه .. مكان سلخ و دبح المواشي … حتي الانتيكخانه .. يعني المتحف و ده اسم المتحف المصري زمان و لسه في ناس بتقول عليه كده … السمعخانه .. و دي مكان في السيده فيه قبه كبيره بيغنوا و ينشدوا تحته و الصوت يتوزع و الناس تسمع 🙂

الشفاخانه .. و دي مكان استشفاء و لكن للحيوانات اكتر .. البني ادمين يروحوا الاستباليه … المهندسخانه و دي كلية الهندسه اللي كانت في جامعه فؤاد الاول اللي بقيت جامعه القاهرة

محمد علي باشا
محمد علي باشا

مش بس مقطع خانه اللي زاد في كلامنا … كمان مقطع ” جي ” بتاع صاحب المهنه او الممارس لفعل … زي الجرنالجي .. الاجزاخنجي .. الفرارجي .. الخضرجي .. القهوجي .. الجزمجي .. العربجي … حتي في السباب و الوصم .. البودرجي و البرشامجي و النسوانجي و الافيونجي  🙂

كمان من اثر الاتراك علينا .. التاء المفتوحة و المقفولة و الهاء .. اللي احنا اصلا بنتلخبط فيهم .. همه حسموا القضيه .. مفيش تاء مقفولة دي .. التاء مفتوحه حتي في اخر الكلمه .. اللي مقفول ده حرف الهاء فقط … يعني نعمة تبقي .. نعمت … و حكمة تبقي حكمت … و خد عندك صفوت و رفعت اللي همه صفوة و رفعة … حشمت .. دولت … بس جم عند مروة …. و منفعش مروت .. همه اصلا عندهم مشكلة مع حرف الواو … بص فوق عنوان اليوم .. ” فلد ” يعني ولد .. كانوا بيقولوا علي الواو .. ف …. فمروة … بقت مرفت 

مساءكم سكر زياده .. و يجزيكم علي صيام االنهارده …. و للحديث بقيه ..
في امان الله

المصدر : هلا جورجيا - ويكيبيديا

زر الذهاب إلى الأعلى