حلاوة زمان (3) .. ابلة فضيلة | سلسلة رمضان زمان
حلاوة زمان سلسلة حصرية تأخذنا في حنين لذكريات أيام زمان، يكتبها لنا في رمضان هذا العام المهندس المصري عاشق الأدب والتراث “صلاح أبو الليل” وحلقة اليوم عن “ابلة فضيلة”
حلاوة زمان – 3 – ابلة فضيلة
يا ولاد .. يا ولاد … تعالو تعالو …
علشان نسمع ابلة فضيلة …
راح تحكيلنا حكاية جميلة ..
مين فينا مكانش بيستني التتر ده كل يوم الصبح ..
يبدا بيه يومه .. ده قبل ما ندخل المدرسه و يبقي صعب نسمعه .. لانه غالبا بيكون في الحصة الاولي ..
بس في الاجازات و ايام الجمع كنا بنفتح عنينا عليه …
انا شخصيا قضيت طفولتي كلها مش عارف شكل ابلة فضيلة … بس حافظ و عاشق لصوتها و حواديتها
طبعا ممكن حد يسالني … و ايه اللي فكرك بيها دلوقتي ؟
اصل رمضان جي في بداية الصيف .. و زمان لما رمضان كان بييجي في نفس الوقت ده من حاجه و ثلاثين سنه
كنا بنسمع ابلة فضيلة الصبح … و نحل فزورة اجمل الزهور بتاعت ماما نجوي ” فاتحي يا زهور فاتحي ”
او زهور من نور … بتاعت صفاء أبو السعود … الظهر
و عمو فؤاد .. سواء بيلف بلاد .. أو جوه الإستاد .. أو ويا الأجداد … العصر
و بالليل نشوف فزورة نيللي ” يا مساء الفوازير ” صورة و 30 فزورة … ام العريف .. صندوق الدنيا
” معلش معلش .. ايه يعني معرفتهشي … هنزل اجيبلك سيد سيده … فستاني متشدهشي ” .. الخاطبة
الحقيقة اني افتكرت كل الذكريات دي ..
و حبيت اشاركها معاكم … أول ما سمعت خبر وفاة الفنانة محسنة توفيق … ” بهية ” في فيلم العصفور بتاع يوسف شاهين .. اللي اتغنت فيه كلمات احمد فؤاد نجم .. مصر يا مه يا بهية .. و ده فيلم يوثق لأحداث النكسة و تم عرضه قبل نصر أكتوبر 73.
فضيلة توفيق .. ابلة فضيلة
محسنة توفيق هي الأخت الأصغر بعشر سنين للست ابلة فضيلة .. و الأثنين ساعدوا بشكل مباشر و غير مباشر في صياغة فكرنا سواء في مرحلة الطفولة أو ما بعدها … شاركوا بالصوت … صوت ابلة فضيله .. أو بالصورة … تمثيل محسنة
برضه نيللي و عمو فؤاد و نجوي إبراهيم و صفاء أبو السعود .. زودوا من معلوماتنا العامة و ثقافتنا بشكل كبير .. الفوازير دي اختراع مصري عبقري
ده جزء برضه من حلاوة زمان … حلاوة برامج زمان و أفلام زمان … و فوازير زمان
يومكم جميل … و طابت ذكرياتكم
المصدر : هلا جورجيا - ويكيبيديا
