رمضان 2020 | رمضان زمان | الحلقة (1) .. هاتوا الفوانيس

رمضان 2020 | يأتينا هذا العام رمضان في زمن الكورونا ، حيث قد تختلف عاداتنا كليةً عما اعتدنا لكن حتى ما سبقه كان يختلف بالتأكيد عن رمضان زمان عندما كان لرمضان لون وطعم ورائحة. رمضان زمان سلسلة حصرية يكتبها لنا في رمضان هذا العام المهندس المصري عاشق الأدب والتراث “صلاح أبو الليل”

رمضان 2020 – رمضان زمان

الحلقة الأولى – هاتوا الفوانيس

هاتوا الفوانيس ياولاد هاتوا الفوانيس
ح نزف عريس ياولاد
ح نزف عريس
ح يكون فرحه تلاتين ليلة
ح نغني ونعمل هوليلة
وح نشبع من حلوياته
هاتوا الفوانيس ياولاد هاتوا الفوانيس

تنساب هذه الاغنية بصوت العبقري محمد فوزي في كل مكان مع قرب دخول شهر رمضان .. بتفكرنا بأجمل الذكريات .. بتاخدنا لزمان و رمضان زمان .. الفانوس النحاس ابو شمعه .. الكنافة و القطايف العصافيري المحندقة .. السحور و لمة الفطار .. عمو فؤاد و جدو عبده اللي زرع أرضه … شيريهان و كاريمه و حاليمه و فاطيمه … نيللي .. الخاطبه .. ” الهوا منا فلا ” .. ” و الخلا ولا هسه ” … كل دي حاجات ميعرفهاش غير جيل الوسط .. مواليد الستينات و السبعينات و الثمانينات … اللي حضروا التلفزيون الأبيض و أسود و برامج عصافير الجنه بتاع سلوي حجازي .. و اجمل الزهور و بقلظ وماما نجوي.

نرجع لأغنية ” هاتوا الفوانيس ” … الأغنية العبقرية دي ( و كلماتها بالكامل في نهاية المقال ) دي من الحان و غناء محمد فوزي .. بس الناس غالبا بتنسي كاتب الكلمات … و ده الجندي المجهول غالبا في معظم الأغاني .. إلا إذا كان في شهرة عبد الوهاب محمد أو حسين السيد وفتحي قوره والأخوة الشناوي مثلا.

كاتب الأغنية دي هو الشاعر والكاتب عبد العزيز سلام … اللي كتب لسعاد محمد مثلا … “بقي عايز تنساني ” … وكتب للشحرورة صباح.. ” أحبك ياني ” .. وكتب لمحرم فؤاد ” يا واحشني رد عليا ” اللي كانت من ألحان فريد الأطرش و غناها اكتر من مره بصوته.

عمل لفوزي برضه الأغنية العبقرية ” داري العيون داريها ” .. و فوزي ده لينا معاه حواديت طويلة هنحكيها في وقتها …
الجيل الأكبر مننا ياريت تحكيلنا عن ذكريات رمضان معاه … والجيل الأصغر يا بخته باللي هيسمعه مننا و منهم … 
مش بس اغنية هاتوا الفوانيس اللي بتحرك جوانا الحنين لـ رمضان زمان .. و حلاوة ايام زمان.

كمان عبد العزيز محمود لما يقول ” مرحب شهر الصوم مرحب ” … و لا عبد المطلب اللي كان بيروح مرتين من السيدة لسيدنا الحسين .. لما يقول ” رمضان جانا وفرحنا به بعد غيابه .. اهلا رمضان ” و قنديل بتاع اشهر ثلاث سلامات لما يقول ” والله بعودة يا رمضان.. رمضان رمضان ” … و في فتره متقدمة شويه يمكن أواخر الستينيات مثلا .. ظهروا الثلاثي المرح و أغنيتهم ” أهو جه يا ولاد .. هيصوا يا ولاد”.

أغاني ارتبطت بذكريات مش هترجع تاني .. و أماكن ممكن تكون مش موجوده دلوقتي .. و ناس سفرتنا فاضيه من غيرهم في أول فطار في رمضان.

كل سنه و انتوا طيبين .. فرحانين .. و اعاننا الله علي القيام و الصيام .. و جمعنا كلنا مع حبايبنا في شهره الفضيل.

إذا أعجبك المحتوى لا تنس أن تسجل إعجابك و تترك لنا تعليقك لنستمر .. رمضان كريم

المصدر : هلا جورجيا - ويكيبيديا