حلاوة زمان (5) .. التليفون أبو قرص | سلسلة رمضان زمان
حلاوة زمان سلسلة حصرية تأخذنا في حنين لذكريات أيام زمان، يكتبها لنا في رمضان هذا العام المهندس المصري عاشق الأدب والتراث “صلاح أبو الليل” وحلقة اليوم عن “التليفون أبو قرص”
حلاوة زمان – 5 – التليفون أبو قرص
جمعه مباركة عليكم جميعا .. خامس أيام شهر رمضان الكريم … كان المفروض أتكلم النهارده عن الفانوس الصفيح .. بس كمية المكالمات اللي جاتلي امبارح من اصحابي و اخواتي خلتني مبسوط اوي و عايز اتكلم عن موضوع تاني … موضوع التيلفون أبو قرص … يا تري لسه فاكرينه ؟؟
ايوه هو بتاع زمان اللي كان اسود و سماعته فيها حته كده زي البوق بتجمع الصوت … زمان .. من قبل حتي رمضان ما ييجي في الربيع .. من أول ما فتحت عنيا ع الدنيا و كان التليفون أبو قرص ده موجود .. و كان مصدر فرحة في كل بيوتنا .. لما تيجيلنا مكالمة من ناس مسمعناش صوتهم بقالنا كتير … و لما حد يتصل بينا من تليفون بيته اللي لسه مركبه .. و يقولنا .. بكل فرحه .. اكتب النمرة عندك علشان تبقي تكلمني عليها علي طول … بيمليك الرقم علشان مكانش فيه اظهار رقم طالب … علشان كده .. كانت كل مكالمة شايله معاها مفاجأة.
بقالنا كتير معملناش كده .. متصلناش باصحابنا و قرايبنا و حبايبنا و قولنا لهم كل سنه و انتو طيبين ووصلنا مع الصوت طاقة إيجابيه و فرحة .. عالمنا الافتراضي اللي فرض نفسه علينا و دخلنا في دوامته هو اللي عمل فينا كده …
زمان اوي كنا بنروح نزور بعض في المواسم و الاعياد … و شايلين ” الزيارة ” في ايدينا .. اختفت الزيارة و اختفت الزيارات و حل محلها مكالمات التيلفون أبو قرص ..اللي معمرش كتير و ظهرلنا … المحمول .. اللي خلي الناس ترن علي بعض علشان تسلم و تتطمن … و بعدها ظهر الماسنجر و الواتس اب .. و الرسايل الماسخه المنقوله من بعض .. الرسايل البارده اللي ملهاش اي طعم .. بس بتقضي الغرض …
حلاوة زمان .. أول تليفون
كانت مكالمتنا (و لازالت) بتبتدي بـ …. “ألــــــــو” اللي هيه منقولة من Hello الإنجليزية اللى ظهرت أول مرة في اللغة الإنجليزية سنة 1833 ف رواية أمريكية وانتشرت بعدها ، وأول ما جراهام بل إخترع التليفون سنة 1876كان بيستخدم لفظة آهوي “Ahoy” وهي نفسها اللفظة اللي كانت بتستخدم في نداءات السفن البحرية ، لكن بعدها بسنة بس 1877 توماس أديسون اللي اقترح على شركة التلغراف الأمريكية اللى شغلت أول شبكة تليفون ف العالم ” انه يستخدم لفظة (هالو أو ألـــــــو) لانها على حد قوله ” ممكن تتسمع بوضوح من على مسافة .. لحد ما بقيت هي دي بداية كل مكالمة ..
هتفرح اوي لما تعرف ان بعدها بست سنين بس دخل التليفون مصر “تليفون شبه اللى في الصورة مش التليفون أبو قرص طبعاً” وللأسف ده كان مع بداية الاحتلال البريطاني لمصر 1882 ودخل التليفون مصر بحكم إحتلالهم لينا، ومعاه السكة الحديد وكتير من الوسائل المساعدة لربط الإمبراطورية البريطانية بمستعمراتها
احنا كنا من أوائل الدول اللي تستخدم الاختراع ده .. و لسه مفتاح مصر (0020) لحد دلوقتي.
و عموما كل مفاتيح إفريقيا تبدأ بالرقم 002 لكن المميز إن مصر وجنوب إفريقيا هما الدولتين الوحيدتين في أفريقيا اللي ليهم مفتاح من رقمين (مصر 002 و جنوب إفريقيا 0027 وهو امر تختص به الدول الكبري (أو مستعمرات الدول الكبرى) طبعاً مننساش إن جنوب إفريقيا كانت هي كمان مستعمرة بريطانية كبري.
رغم ان مفتاح بريطانيا نفسها (0044) .. ليه؟ .. متعرفش !
متكلمناش علي فانوس رمضان الصفيح … بكره بإذن الله .. وللحديث بقية
اتسحروا كويس … و في أمان الله
المصدر : هلا جورجيا - ويكيبيديا
