رمضان 2020 | رمضان زمان | الحلقة (4) .. اللي ميعرفش يقول عدس

رمضان 2020 | يأتينا هذا العام رمضان في زمن الكورونا، حيث قد تختلف عاداتنا كليةً عما اعتدنا لكن حتى ما سبقه كان يختلف بالتأكيد عن رمضان زمان عندما كان لرمضان لون وطعم ورائحة. رمضان زمان سلسلة حصرية يكتبها لنا في رمضان هذا العام المهندس المصري عاشق الأدب والتراث “صلاح أبو الليل” وحلقة اليوم عن “اللي ميعرفش يقول عدس”

رمضان 2020 – رمضان زمان

الحلقة الرابعة- اللي ميعرفش يقول عدس

الأمثال الشعبية دي خلاصة خبرات و معلومات بنحطها في كبسوله بتختصر الكثير في الكلام و توصل المقصود بسرعه و دقة .. ده عند كل شعوب الأرض .. بس احنا كمصريين بنضيف ليها بهارات من خفة الدم و التريقه .. فبيطلع مثل دمه خفيف.

اليومين دول كترت أوي الفلسفة و الحكمة و العمق و ادعاء الفهم .. و أتقسم المجتمع إلي فئات و فرق و أحزاب .. منهم اللي علي حق .. و منهم اللي بيألف و يفتي و ينظر عمال علي بطال … يعني اللي مبيعرفش و يقول عدس 🙂
و ده مثل من اهم أمثلتنا الشعبية القديمة … و له قصة دمها خفيف … بترجع لأيام العصر الفاطميبيقولكم يا سادة .. إن واحد من تجار الحبوب .. الفول و العدس و القمح و خلافه … رجع بيته علي غير معاده فلقي مراته بتخونه … العشيق جري نط بره البيت .. و هو بيخرج من البيت اتكعبل في شوال عدس و دلقه علي الأرض.

الناس في الشارع شايفه العشيق – و افتكروه حرامي – و التاجر و بيجري وراه بساطور عايز يموته .. و العدس متبعتر علي الأرض … جريوا ورا التاجر يهدوه و يقولوله .. حرام عليك .. كل ده !! .. ده حرامي هايف و كان طمعان في شويه عدس .. هتودي نفسك في داهيه علشانه ؟؟

التاجر مش عارف يتكلم و يقول الحقيقة و يفضح نفسه و مراته … فقال ” معلش ما هو اللي ميعرفش يقول عدس ”
و بقي مضرب مثل للي مش عارف و بيتكلم و خلاص 🙂
ودلوقتي أسيبكم تستعدوا للفطار .. وصوما مقبولا يا حضرات

تابع: رمضان 2020 | رمضان زمان | الحلقة (3) .. حارة السقايين و حكاية مكان

المصدر : هلا جورجيا - صلاح أبو الليل