رمضان 2020 | رمضان زمان | الحلقة (3) .. حارة السقايين و حكاية مكان
رمضان 2020 | يأتينا هذا العام رمضان في زمن الكورونا ، حيث قد تختلف عاداتنا كليةً عما اعتدنا لكن حتى ما سبقه كان يختلف بالتأكيد عن رمضان زمان عندما كان لرمضان لون وطعم ورائحة. رمضان زمان سلسلة حصرية يكتبها لنا في رمضان هذا العام المهندس المصري عاشق الأدب والتراث “صلاح أبو الليل” وحلقة اليوم عن “حارة السقايين”
رمضان 2020 – رمضان زمان
الحلقة الثالثة – حارة السقايين
مفيناش حاورينى يا كيكا مفيناش لف و دوران
مبقاش فى وقت يا روحى للشكوى والهجران
ليك ماضى كله سوابق فى الحب ملكش امان
وانا عايزك حب حنين مش حب يودي لومان
انا لا عمرى احب الخاين ولا احب الكدابين
“متروحش تبيع الميه فى حارة السقايين”
سنة 2012 في مصر، الكينج محمد منير نزل أول ألبوم له بعد الثورة وكان اسمه “أهل العرب والطرب”، وكعاده محمد منير في كل ألبوم يعيد توزيح وإحياء أغنية من أغاني زمان، لكن منير عشان كينج كان بيضيف لها من روحه وتوزيعاته اللي يخليك تسمعها كأنه أول مرة تتغنى.
في الألبوم ده منير قرر يعيد توزيع أغنية “حارة السقايين”، الأغنية الأصلية كانت لشريفة فاضل من فيلم بنفس الاسم ” حارة السقايين “، و الفيلم كان من إنتاج 1966 لكن منير عدل شوية في روح الكلمات الأصلية اللي كانت بتقول فيها شريفة فاضل:
على مين على مين
على مين ياسيد العارفين
بتبيع الحب لمين
ان كنت جاى تغنى روح اسال قبل انا مين
متروحش تبيع الميه فى حارة السقايين
حارة السقايين .. حكاية مثل
التيمة الأساسية في الأغنية دي هي المثل الشعبي القديم اللي أغلبنا يعرفه “متروحش تبيع الميه .. في حارة السقايين” ، وده مثل بينضرب للفت نظر اللي بيتقال فيه المثل أنه ميكدبش ويلف ويدور لئن كذبته مش هتدخل على اللي بيكلمه “بالظبط زي مقطع الأغنية ما بيقول.
وأحيانا الغرض منه هو الدلالة على الحماقة في التصرف، بمعنى مين الأحمق المجنون اللي هينزل يبيع مياه في وسط مكان كل أهله شغلتهم بيع الميه، مين هيشتري منه ده :).
كتير مننا بيسمع المثل ويردده، لكن يمكن مش كتير مننا يعرف أن حارة السقايين دي ، مش مجرد مضرب مثل ، ده مكان موجود فعلاً .. في قلب أقدم أحياء قلب القاهرة القديمة، من أكتر من 100 سنة، ولحد وقتنا ده .. وزي ما لكل مثل حكاية ، لكل مكان كمان حكاية .. عرفنا حكاية مثل “حارة السقايين” .. طب ما تيجوا نشوف حكاية المكان بقى.
حارة السقايين .. حكاية مكان
قررت اقطع الوقت و اروح ازور حارة السقايين .. الحارة في حي عابدين و قريبه جدا من منطقة السيدة زينب .. في شارع متفرع من شارع مجلس الشعب .. اللي في ميدان لاظوغلي .. المنطقة اللي كلنا مشينا فيها يمكن من غير ما ناخد بالنا من الحارة دي … حارة السقايين في المربع الذهبي اللي بين شارع محمد فريد و شارع الشيخ ريحان و شارع مجلس الشعب .. وبتصب في شارع بورسعيد …. ” بتصب ” .. أيوه هي فعلا بتصب.
أصلها كانت فرع من فروع النيل والمنطقة كلها كانت مليانه فروع أو ترع صغيرة .. أماكن كانت بتركن فيها الميه في أوقات الفيضان و ارتفاع منسوب النيل .. النيل الميه تزيد فيه .. يدخل في الخليج الناصري من عند فم الخليج “قرب منطقة المنيل و أول سور مجري العيون” ينزل في الخليج الناصري و يتفرع في شوارع وحارات منطقة السيدة زينب .. و يركن قريب من حارة السقايين عند بركة الفيل.
بركة الفيل .. اتسمت كده لان ابن طولون كان مربي فيها فيل فعلا ، وبركة الفيل دي هيكون لنا عنها حكاية لوحدها في حدوتة جديدة من حواديت رمضان زمان.
المنطقة دي كانت عمرانه بطمي النيل، يعني مليانة بالزراعة و الخير .. الميه كانت بتوصل لوسط البلد ” حاليا ” يعني لطلعت حرب و ميدان رمسيس كمان اللي كان فيه بحيرة كبيرة في وسطه زمان.
كثرة الميه في منطقة السيدة هي السبب في سكن السقايين في المنطقة .. يصحوا الصبح يملو القرب ” جمع قربة ” بتاعتهم و يطلعوا يملو الازيار و خزانات البيوت الكبيرة والمباني العامة .. ده في زمن ما قبل المواسير و مواتير المياه … بنتكلم علي زمن من تقريبا 200 سنة فاتت ، ولحد من حوالي 120 سنه مثلا.
تكتل السقايين عمل ليهم مجتمع وطايفة ومنطقة باسمهم وكان ليهم كمان شيخ طايفة “رئيس نقابة يعني” .. زي السروجية و الفحامين و العقادين و النحاسين و الصندوقجية .. زي الخيامية و التمبكشية و الضبايبة … بس الاختلاف ان كل الأسماء اللي ذكرتها كانت مناطق صناعية و تجاريه الزبون بيروح يشتري منها و العامل بيشتغل فيها .. إنما السقايين كانت منطقة سكنية و الساقي بيطلع منها يروح للزبون و يرجع يبات فيها يصحي يملى المايه و يلف يوزع و هو ده جدوله اليومي.
شاهد بالفيديو | حكاية مكان .. حكاية مثل:
حارة السقايين .. والمدرسة الخديوية
منطقة حارة السقايين زمان كان ليها شكل مختلف تماما عن دلوقتي .. تخيلوا ان شارع بورسعيد كان مجرى مائي كبير .. وبيمر من قدام المدرسة الخديوية ” اللي خرجت و لسه بتخرج أجيال ” المدرسة اللي كانت قصر مصطفى باشا فاضل .. مين بقي مصطفي باشا فاضل ؟
ده يبقى ابن إبراهيم باشا .. يعني يبقي حفيد محمد علي باشا … يعني أخو الخديوي إسماعيل … اخوه اللي اصغر منه بأربعين يوم بس .. مش غريبه ما هما أخوة مش أشقاء .. من أمهات مختلفة .. و الأربعين يوم دول هما اللي خلوا الحكم يبقي لإسماعيل بصفته الاكبر .. وبعدها يفضل الحكم في عيلة إسماعيل باشا علي طول لحد الملك فاروق وابنه الملك فؤاد الأول اللى كان آخر ملوك مصر وقت قيام ثورة يوليو سنة 1952م.
قصر مصطفى بهجت فاضل باشا ” اللي بقي المدرسة الخديوية فيما بعد ” و جنبها جامع اتدفن فيه هو و أبنه، و الجامع موجود لحد دلوقتي، بمئذنته المملوكي اللي بتميزه. مئذنة مملوكي !! .. أيوه ، ما هو الجامع ده مابنهوش مصطفى فاضل .. ده كان جامع قديم مبني من أيام حكم المماليك.
بناه “بشتاك الناصري” أيام حكم السلطان الناصر محمد بن قلاوون .. وجددته ألفت قادن أم مصطفى فاضل .. و سابت المئذنة علي وضعها القديم .. و بعدها تم نقل رفات مصطفى فاضل من اسطنبول و ادفن هو وإبنه أحمد رشدي في المسجد.
المسجد كان قدامه علي الضفه الثانيه ” خانقاه ” بناها برضه بشتاك الناصري.
وبنقول الضفة التانية لأن الجامع كان قدامه مجري مائي، وفيه قنطرة أو معدية بتربط الجامع بـ “الخانقاه” ، والخانقاه دي مكان لتجمع الصوفيين و إقامتهم و الذكر و التعليم كمان .. و بتعتبر من المباني الخيرية و الصدقة الجارية.
و بالمناسبة كان في خانقاه كبيرة في طريق بلبيس اشتهرت بها المنطقة بناها الناصر محمد بن قلاوون برضه، حتي أن المنطقة بقت معروفة باسم الخانكة “تحريف لكلمة خانقاه” ، اتهدت و اتبني مكانها جامع في زمن الأشرف برسباي موجود واسمه جامع الأشرف .. بس منطقة الخانكة كانت مشهورة بمستشفى الأمراض العقلية اللي كانت هناك .. و كان ليها نصيب كبير في حواراتنا اليومية والنكت لأن كلمة خانكة ارتبطت معانا بمستشفى “المجانين”.
*ممكن تعرف أكتر عن الخانقاه من : ويكيبيديا
شاهد بالفيديو | محمد منير و نانسي عجرم وأحلى دويتو لايف لأغنية حارة السقايين :
بالمناسبة تفتكروا أنهي إصدار لأغنية “حارة السقايين” كان احلى على ودانكم اللى غنتها شريفة فاضل ولا اللى غناها محمد منير ؟
إذا أعجبك المحتوى لا تنس أن تسجل إعجابك و تترك لنا تعليقك لنستمر .. رمضان كريم
المصدر : هلا جورجيا - ويكيبيديا
