رمضان زمان (15) المئذنة الملوية.. مصري قبطي أم سامرائي عراقي؟ | سلسلة رمضان زمان
حلاوة زمان سلسلة حصرية تأخذنا في حنين لذكريات أيام زمان، يكتبها لنا في رمضان هذا العام المهندس المصري عاشق الأدب والتراث “صلاح أبو الليل” وحلقة اليوم عن “المئذنة الملوية”
حلاوة زمان – 15 – المئذنة الملوية
رمضان كريم وكله مغفرة .. فات النص بسرعة ، ملحقناش .. يعني كلها كام يوم ونلاقي كلمات الشاعر/ عبد الفتاح مصطفي وصوت شريفة فاضل بيرنوا ف كل حته .. “تم البدر بدري .. والأيام بتجري”
نرجع بقي إلى المئذنة الملوية أو مأذنة جامع أحمد إبن طولون .. وجامع أحمد إبن طولون ثالث أقدم جامع ف مصر من القرن التاسع الميلادي (يعني اكتر من 1200 سنة) بعد جامع عمرو بن العاص وجامع العسكر
وثاني أكبر جامع ومن المساجد المعلقة لأنه اتبني فوق روبة عالية ، أما بقي المئذنة الجميلة العجيبة دي وقصة بناء الجامع ف كان فيه روايتين ف بناءها:
- أولهم أن اللى بناها هو المهندس القبطي سعيد الفرعاني ” وده كان بيبني عين مياه لابن طولون ولما راح يفتتحها كانت لسه طرية حولها فغاصت رجلين فرسه وافتكر ان الراجل القبطي كان عامله فخ عشان يقتله فأمر بسجنه ..
- وبعدها بفترة لما قرر ابن طولون يعمل اكبر جامع ف مصر قدروا حجم الاعمدة الرخام اللى يحتاجها ب 300 عمود (وقالوله مش هتلاقي العدد ده غير انك تاخد عواميد من الكنايس والاديرة والمعابد القديمة) لكن أحمد ابن طولون استنكر الفكرة واستحرمها ..
- فلما سمع المهندس القبطي المصري بالقصة في السجن بعت لأبن طولون يتحداه انه يقدر يعمل تصميم للجامع والمأذنة من غير ولا عمود واحد (غير عمودين القبلة بس) .. خرجة ابن طولون وعمل المهندس الفرعاني التحفة المعمارية اللي على مساحة 26 الف متر مربع اكتر من 6 فدان كاملين .
- القصة التانية بتقول ان المهندس اللى جه من العراق مخصوص عشان يصمم وينفذ مقياس النيل (اللى موجود حالياً ف جزيرة الروضة جمب قصر المنسترلي ومتحف أم كلثوم) المهندس ده من سامراء في العراق واسمه أحمد الحاسب والمؤرخين اللى بيرجحوا القصة دي عشان شكل المأذنة الملوية نفس تصاميم مآذن سامراء العراقية الملتوية.
أما ابن طولون اللي عمر مصر ف الوقت ده وفصلها عن الخلافة العباسية في بغداد وأسس لدولة حديثة كانت تسمي الدولة الطولونية وكفاية ان جامع أحمد أبن طولون بقي بعد كل القرون دي بحالته وحالات الترميم فيه كانت محدودة جداً .. جامع احمد ابن طولون كان مرسوم على العملة المصرية فئة الخمسة جنيه من أوائل الخمسينيات ولحد دلوقتي .. الخمسة جنية اللى في الصورة قدامك يا حضرات الأفاضل دي وقت طباعتها كانت تشتري جنيه الملك او الجنيه الذهب يعني 8 جرامات كاملة من الذهب الخالص عيار 24 قيراط.
يا تري الخمس جنيه مصري دلوقتي .. تشتري ايه ف مصر ؟
شاركونا تعليقاتكم .. بتشتري ايه بخمسة جنيه النهاردة؟
المصدر : هلا جورجيا - ويكيبيديا
